Prokuroria e Posaçme kundër Korrupsionit (SPAK) dërgoi në gjyq kryebashkiakun aktual të Tiranës, Erion Veliaj dhe bashkëshorten e tij Ajola Xoxa përkatësisht për 13 dhe 12 akuza penale.
Në një dosje voluminoze, prokuroria i akuzon ata për korrupsion, pastrim parash dhe shpërdorim detyre.
“Hetimi penal ka mbledhur të dhëna konkrete, të cilat provojnë pa asnjë dyshim të arsyeshëm, se i pandehuri Erion Veliaj, në cilësinë e Kryetarit të Bashkisë Tiranë, me firmën e tij ka miratuar në çdo rast shpërndarjen e këtyre fondeve, të cilat më pas kanë përfunduar në OJQ-të e lartpërmendura, shoqëri me përgjegjësi të kufizuar, persona fizikë të kontrolluar nga bashkëshortja e tij, e pandehura Ajola Xoxa, si dhe individë të afërt me të,” thuhet në dosje.
Prokuroria e Posaçme njoftoi se hetimi paraprak ka provuar se Veliaj, në cilësinë e Kryetarit të Bashkisë Tiranë, ka marrë përfitime të parregullta nga kompanitë e ndërtimit dhe organizatat jofitimprurëse, në këmbim të lejeve të ndërtimit dhe fondeve publike, ndërsa shumat e marra janë kanalizuar në pasuri të paluajtshme, aktivitete tregtare dhe shpenzime luksoze të familjes së tij.
Burimi: Albanian Daily News