Deputetët e opozitës janë përplasur me punonjësit e Gardës së Republikës në hyrje të Parlamentit, ndërsa tensionet u shtuan me fillimin e seancës plenare në orën 10:00 të kësaj të hëne.
Punonjësit e Gardës kërkuan kontroll fizik ndaj deputetëve të Partisë Demokratike (PD), të cilët refuzuan me argumentin se kjo bie ndesh me rregulloren e Kuvendit.
Ndërkohë, dhjetëra gardistë rrethuan sallën dhe deputetët e opozitës grumbulluan sërish karriget.
Disa nga deputetët e opozitës u përplasën me gardistët, ndërsa Flamur Noka ndezi një flakadan portokalli.
Pas këtij veprimi, Kryetarja e Kuvendit, Lindita Nikolla, e përjashtoi atë nga seanca plenare. Noka nuk u largua, por u vuri flakën letrave, ndërsa tentoi t’u vinte flakën edhe karrigeve të grumbulluara në foltore.
Ky veprim i rëndë u parandalua nga gardistët të cilët shuan zjarrin.
Mes kaosit dhe përplasjes së tavolinave nga deputetët e opozitës, seanca plenare u mbyll me urdhër të Nikollës deri në një njoftim të dytë.
Megjithatë, ky është i njëjti skenar i përsëritur në seancat e fundit plenare në Kuvend.
Burimi: Albanian Daily News